عسير صحيفة عسير الإلكترونية
بقلم 🖌️ شهد القحطاني
يمكن رجعت الحياة شوي لطبيعتها، الناس تطلع وتسافر وتختلط،
بس لا تصدق وتقول إنا فعلاً تخطينا.
كورونا ما كانت بس مرض، كانت زلزال قلب كل شي في حياتنا.
غيرتنا من الداخل، غيرت طريقتنا في التفكير، في التعامل مع الناس، حتى في أبسط العادات.
صرنا نخاف من أي كحة، نحسب حساب الزحمة، نعقم كل شي قبل نلمسه،
ناس فقدت أحبابها، ناس خسروا شغلهم وتعب سنين،
وناس للحين تحاول ترجع لحالة نفسية مستقرة.
كلنا تغيرنا، ولو مو في الشكل، ففي القلب والعقل.
واللي يزيدك حيرة، إنك تسمع ناس الحين يقولون:
“كورونا كانت كذبة، فيلم عالمي ضحكوا فيه على الشعوب.”
طيب إذا كانت كذبة… من اللي كان يموت؟
من اللي كان على أجهزة التنفس؟ من اللي بكينا عليه وما رجع؟
الأكفان اللي طلعناها، العيون اللي سهرت بالمستشفيات،
والأهل اللي ودعوا بعضهم من بعيد.
كل هذي كانت تمثيل؟!
يمكن فيه أشياء ما نعرفها، يمكن فيه تضخيم، بس الألم كان حقيقي.
وإذا نسينا، الجروح تذكرنا… كل كم يوم يطلع متحور ، أو يرجع الحديث عن موجة جديدة.
إي نعم، الحياة مشت، ورجعنا نضحك ونعيش،
بس الحقيقة؟
ما تخطينا. أثرها باقي، في النفس، في الذاكرة، وفي كل كمامة نلاقيها بالسيارة.
