وراك ماتتزوج العمرفات

الشاعر/ ضيف الله الأحمري

الاحمري ضيف الله اليا بدع قال
.. قصايدي جابت من الغيم هتان

لا صار في صدري من الحزن موال
.. غنيت بالموال والحاني الحان

اسمع كلام اللي عليه الزمن مال
.. ولا مال راسه لو هذا الزمن شان

يضيق صدر الحر لو كان رجال
.. ويرقى على القمه وفي كل ميدان

واللي يجيب العلم ماشاف الاحوال
.. ولا يعرف اني مع ظروفي انسان

اسمي مثل فعلي ولو الزمن طال
.. لو الجروح كبار فالوقت لي شان

حزني يتل القلب مع ضيقة البال
.. وضيف الله الصبّار لو كان ما كان

ضيف الله اللي جمّل وعاش جمّال
..مع ضيقتي ما اقصر عن الناس الاحسان

اشيل حمل ٍ صعب فالوقت ينشال
.. ولا علي من النميمه ياشجعان

لو عذربوا فيّه ضعيفين وانذال
.. انا وريث المجد ما عشت خوان

يوم المرض فالصدر ما زال ما زال
.. في كل يوم اقول بيزين ما زان

ولا لقيت علاج لكن الامال
.. بيدين خلاق البشر رب الاكوان

بحثت في شتى الدول رحت جوال
.. سهرت ليل اوجاع والنور ما بان

وسلمت امري والوجع اوجع وطال
..واللي سأل وينك عن البيض يافلان

وراك ما تتزوج العمر زوّال
.. طالت سنينك والهوى دوم فتان

انا مريض من المرض انقل جبال
.. حمل ٍ بصدري وصحتي مالها اثمان

والله ما اجيب البنت في وسط الاهوال
لو ان بيت الشوق مبني بسيسان

قلبي خضر واعشق وهذا هو الحال
.. بس ان اعصابي لها الف عنوان

ما عشت طول العمر فالوقت محتال
.. لكن عشت اليوم بالهم بلشان

والا انت عايش في كنفها وتختال
..ولا ذقت هم وموت واوجاع واحزان

ماذقت مر الوقت في جوف فنجال
.. ولا تجرع مثلي ازمان وازمان
>